"Sa mga mahahalimuyak at makukulay na bulaklak ng aking kabataang naisatitik para sa alaalang aking sasariwain at babalik-balikan."
Ang kwento natin ay 'di pang-rom-com na pelikula
Iba ang sukat, sangkap, at timpla
Medyo manamis-namis sa umpisa
Hanggang sa naging mapait ang lasa
Ako ay kaibigan mo lamang sa istorya
Tagamasid, tagasigaw, at tagahanga
Hindi ako at hindi magiging ako ang bida
Sa akdang isinulat para sa inyong dalawa
Ang baon ko sa aking pag-alis
Ang pangarap, pagsisikap, at pagtitiis
Sa pamilyang minamahal na labis
Sa pag-unlad na ninanais-nais
Nangibang-bayan para itanim
Ang butong inaasahang tumubo at umusbong
Kasabay ng panalangin at paggawang taimtim
Sa kinabukasang masagana at mayabong
Itinuturing na mga bagong bayani
Inuuna ang iba kaysa ang sarili
Ang kanyang pamilya ang pinipili
Na handugan ng ngiti sa mga labi
Isang mainit at mahigpit na yakap
Para sa mga Pilipinong lumipad
Alang-alang sa pagtupad ng pangarap
Alang-alang sa maginhawang hinaharap
Ang apoy na kumokonsumo
Sa dibdib kong nanlulumo
Bitbit-bitbit na ng sandaang siglo
Buhat sa damdaming tinatago
Para hindi masilayan ng mundo
Ang pusong naglalagablab sa loob
Doon nagbabaga kaya't nakukulob
Kaya't nagliyab at tuluyang tumataob
'Di na makatakbo ang damdaming nagdurobdob
Nasunog ang pag-asa sa pagkasubsob
Natutunaw ang tao 'pag ang mundo'y nagugunaw
Nalulusaw ang daigdig 'pag ang pag-ibig ay pumanaw
Hindi man makagalaw ang damdamin naman ay nagsusumigaw
Ulan ay pumapatak habang tirik na tirik ang araw
Ganoon 'pag ang saya at lungkot salitan kung dumalaw
Ewan ko ba?
Tinuruan ko na lang makalimot
Ang puso kong tanga
Sa mga nakaraang masalimuot
Siguro ganoon na nga
Kapag ikaw ay isang duwag
Sa mga problema
Ikaw ay hindi makapalag
Ganyan ka na lang ba?
Habang buhay iiwas at tatakas
Magbago ka na
Harapin ang buhay at maging malakas
Solusyon ang panawagan at hinahanap
Ng mga Pilipinong nagpupursigi at nangangarap
Para maiahon ang Inang Bayang sadlak sa hirap
Ngayon at sa mas magaan na hinaharap
Ang masang araw-araw nagdarahop
Sa kasalanan ng trapong bulok
Apektado ang Pilipino kahit saang lupalop
Sa utang ng nagdaang lider na nakaluklok
Isa ngang masalimuot na teleserye
Ang buhay nating mga mamamayan
Lahat na yata ng uri ng peste
Sinalakay tayo pwera ang makapangyarihan
Hindi pa isinisilang ay may kasalanan na
Wala pang ginagawa ay mayroon ng sentensya
Nakatali agad ng mga tanikala ang mga paa
Kahit hindi pa natututong ilapat ang talampakan sa lupa
Hindi pa nga alam kung paano magbilang
Mayroon na agad siyang babayarang utang
Parang wala na tayong takas, wala ng kawala
Sa buhay natin dito sa lupang sadlak sa dusa
Kung mayroon mang kahit mumo ng pag-asa
Lilimusin ko agad upang makayanan ang bigat na dala-dala
Nilakad natin nang nakayapak
Ang daanang lubak-lubak
Tayo na ay unti-unting nawawasak
Hanggang 'di namalayang bumabagsak
Lango at lasing na sa alak
Sa oras na pumapatak
Habang ang puso'y nabibiyak
Ang mata'y iyak nang iyak
Ikaw at ako sabay nating tinahak
Ang paglalakabay na hindi tiyak
Ang inaakala nating ginto't pilak
Puno pala ng sindak at sadlak
Ako ay talinhaga Nakagapos sa tanikala Nakabusal ang bibig Nakapiring ang mata Nilisan ng pag-ibig Yaring puso at diwa Ako ay talinhaga Na...