ANAESTHESIA (2025)

Namamanhid...

Nasasamid...

Tinurukan ng anaesthesia

Para limutin ang nakaraang sentensiya

IKA-39 TAON NG EDSA REVOLUTION SA MGA PILIPINO DITO AT PILIPINO DOON: REPLEKSYONG PAPEL SA SOSYOLOHIKAL NA IMAHINASYON NINA MILLS AT BLUMER (2025)

Kahit pilit pigilan ang EDSA Revolution sa ika-39 taon nito bilang isang ganap na paggunita sa ating bansa, hindi naman nito mabubura ang malaking epekto sa kasaysayan nating mga Pilipino. Lalo’t higit dapat itong alalahanin sa kasalukuyan dahil nakaupong muli ang pamilya ng dating diktador sa Malacañang. Katulad ng konsepto nina Mills at Blumer, ang ating mga personal na buhay daw ay karugtong at kaputol ng ating kasaysayan, aking hinanap ang koneksyon ng EDSA sa mga OFW at kabataan ngayon. Ano nga ba ang kahalagahan ng EDSA sa atin gayong matagal na itong nangyari?

PILIPINO DOON

Ang aking ama ay 2nd generation Overseas Filipino Worker (OFW) sa Saudi Arabia bilang driver, nauna ang aking lolo na nagtrabaho dito bilang professional barber noong dekada ‘80. Noong pagsisimula ng dekada ‘70, ilang taon bago ang Martial Law at EDSA Revolution nagsimulang magpadala ng mga manggagawang Pinoy sa Saudi Arabia. (Dumia, 2010). Isa sa mga nabanggit ng aking tatay na dahilan sa pangingibang-bansa ay ang mas mataas na halaga ng dolyar sa piso bunsod ng inflation rate na napagdaanan na ng Pilipinas noong panahon ng Batas Militar. Noong dekada ’70 ay naitala ang double digit inflation rates kaya’t mas pinipili ng karamihan ang maging FIlipino overseas worker. (Punongbayan, 2021). Kaya’t patuloy na nanawagan ang mga Pilipino doon o mga OFW gaya ng aking ama na mapangalagaan ang mga manggagawang Pinoy sa loob o labas man ng bansa.

PILIPINO DITO

Isa rin sa binunga ng pagtuldok sa Batas Militar ay pagbibigay-boses sa mga kabataan na siyang sinikil ng nakaraang diktadurya. Kaya’t tulad ng isang Sangguniang Kabataan Chairman na nagsasagawa ng mga proyektong naglalayong tugunan ang suliranin ng out-of-school youth, mental health concerns, limited access to quality education, livelihood, at plastic waste. Ngunit, isa sa mga nais niyang pagtuonan ng pansin ay ang mababang partisipasyon ng mga kabataan sa proyekto ng SK o ng barangay dahil alam niyang ‘di permanente ang kaniyang posisyon kaya’t gusto niyang hubugin ang susunod na kabataang magiging lider at nang mahikayat ang mga Pilipino dito na makilahok at makialam sa mga usaping panlipunan.

MODERNONG BAYANI  AT PAG-ASA NG BAYAN

Tinataguring modernong bayani ang mga OFW at pag-asa ng bayan ang mga kabataan ngunit tila hindi pa rin nabibigyang-boses ang mga isyung nakaaapekto sa kanila at sa mga mamamayang Pilipino. Kaya’t nananatiling buhay ang diwa ng EDSA sa mga modernong bayani at pag-asa ng bayan kung saan patunay silang ‘di natin kailangan gumamit ng dahas upang makamit ang “unity” ang kailangan natin nagkakaisang paghalal sa isang responsable at may pananagutang gobyerno para sa masa habang tayo’y nagmamartsa sa hinaharap na pantay-pantay at maunlad. Tunay ngang may koneksyon ang kasaysayan at isyung panlipunan sa ating personal na buhay at mga problema gaya ng konsepto nina Mills at Blumer kaya’t makibahagi tayo sa pagbabago ng ating bansa Pilipino man tayo dito o doon, noon at ngayon, lahat ay may koneksyon.

SANGGUNIAN

• Dumia, M. (2010). Of Dreams, Sweat, and Tears: The Kingdom of Saudi Arabia and the Modern Filipino Heroes. Philippine Studies. Vol. 58, No. 4, Basketball Fandom.

• Punongbayan, J. (2021, December 29). [ANALYSIS] Hindi ‘golden age’ ng ekonomiya ang Batas Militar.https://www.rappler.com/voices/thought-leaders/analysis-martial-law-not-golden-age-philippine-economy/

MABUTING KWENTO (2025)

 Bawat ukit ng palad, bawat lilok sa laman Inisip nang mabuti, nilagay dahil may dahilan

Ang ‘di man masabi ng aking mga pobreng labi

Ang sa aking panulat ang tahimik na maghahabi

Ako ay hamak na lupa lamang sa engrandeng mundo

Pawang buhangin sa karagatan ng mga tao

Ngunit ang presensiya ko ay sinisinsin ang pagbuo

Nang sa gayon sa pagpanaw ako ay maging mabuting kwento

LARO NG PAG-IBIG (2025)

 Gustong-gusto kong gustuhin naman ako Pero paano, ako naman itong laging lumalayo Nagkukunwaring matapang pero sa totoo’y naduduwag  Nagsisikip-sikipan pa kaya’t hindi lumuluwag

Itataya ko ba ang sariling tinatangi sa perya

Ano kaya ang nasa likod ng kaniyang mga baraha

Uubusin ko lang ba ang aking oras at mga barya

Sa pagsuyod kung may premyong maiuuwi pa

Ngunit may nagsabi sa’kin na hindi ako matututo

Kung hindi ko patitibukin ang aking pihikang puso

Sa laro ng pag-ibig maaring manalo o matalo

Ang mahalaga sa bawat laro, ikaw ay matututo

KAPAG AKO AY HUMIMLAY AT MAGPANTAY NA ANG PAA (2025)

Kapag ako ay humimlay at magpantay na ang paa

Nais kong iwanan ang aking bawat pangamba

Tanging babaunin ang tinatanging mga alaala

Bitbit ang ngiti ng kasibulan at dumalisay na pagluha

Kapag ako ay malalagutan na ng aking hininga

Sana ay makapagpaalam akong handa at maligaya

Sa mga taong nagbigay-kulay sa buhay kong pininta

Para wala akong taglay na panghihinayang sa’king diwa

Kapag ako ay namayapa at sumakabilang-buhay na

Nais kong iwanan sa mundo ang pag-ibig, ang pag-asa

Dahil kung ‘di ako iibig ay anong saysay ng pusong may sinta

Hindi man ako perpekto ngunit sana ay inyong magunita

 

AKO AY AKO, IKAW AY IKAW (2025)

Takbuhin ko man ang sandaang kilometro

Languyin ko man ang karagatang Pasipiko

Akyatin ko ang tuktok at rurok ng bundok sa mundo

Liparin ko man ang sanlibong ulap sa kalangitang ito

Ako ay ako, ikaw ay ikaw, malayong-malayo

Tignan ko man ang sarili sa salaming nanlalabo

Timbangin ko man ang aking bigat na kilo-kilo

Sukatin ka man ang talas at lalim ng aking talino

Ungkatin ko man ang kabaitang taglay ng aking puso

Ikaw ay ikaw, ako ay ako, hindi magiging pareho

Nagsimula nga ang ‘ako’ sa pagwawakas

Nagkubli ang aking pagkatao sa pagkalas

Sumisibol ang tunay sa huwad sa paglalagas

Pumupurol ang pagkukumpara sa pagtalas

Pagkat ako ay ako, ikaw ay ikaw, walang pagtutulad na patas

 

LIFE BEGINS WHEN IT’S ABOUT TO END (2025)

 Your presence speaks the loudest When you left there where echoes Your words were the gentlest whisper That feels like a good old fellows

Life begins when it’s about to end

As sudden surge of memory flows

To be a good friend, a good person

Surpasses all accolades and heroes

What brings true joys and deep sorrows

Changes in life constantly follows

Who you are is exactly who you’ll be

To the highs of your life and lowest sea