Kapag ako ay humimlay at magpantay na ang paa
Nais kong iwanan ang aking bawat pangamba
Tanging babaunin ang tinatanging mga alaala
Bitbit ang ngiti ng kasibulan at dumalisay na pagluha
Kapag ako ay malalagutan na ng aking hininga
Sana ay makapagpaalam akong handa at maligaya
Sa mga taong nagbigay-kulay sa buhay kong pininta
Para wala akong taglay na panghihinayang sa’king diwa
Kapag ako ay namayapa at sumakabilang-buhay na
Nais kong iwanan sa mundo ang pag-ibig, ang pag-asa
Dahil kung ‘di ako iibig ay anong saysay ng pusong may sinta
Hindi man ako perpekto ngunit sana ay inyong magunita
Walang komento:
Mag-post ng isang Komento