TALO (2022)

 Isinusulat sa bawat pahina ng nobela

Mga salitang hindi mabigkas ng dila

Sa likod ng bawat mahahabang litanya

Nandoon ang sundalong talunan sa giyera

 

Nakalupaypay na agad ang iyong mga braso

Wala pa ngang laban tinanggap na ang pagkatalo

Tinakpan ang ilaw na dapat itanglaw sa mundo

Gumilid ang bida na dapat gumitna sa entablado

Nakikipagbunong-braso sa sarili

Nilalabanan ang mga luha at ngiti

Pilit na ipinagbubunyi

Ang kasawian kong parati

Ako ba ay habambuhay na talunan

Kung sarili ko lang naman ang kalaban

Magpapatalo ba ako sa madilim na yugto

O aakyatin ang balong pinagbagsakan ko

Ang iyong mga pakpak na nakatiklop

Iwagayway at lumipad saan mang lupalop

Tuklasin, halughugin, at liparin

Ang taas ng sa buhay mong hangarin

HINDI AKO ANG IYONG TIPO (2022)

Hindi ako ang iyong tipo

Malayong-malayo

Ang agwat ng ikaw at ako

Sinlawak ng karagatang Pasipiko

Ako itong nagsusumiksik

Sa buhay ay mistulang tinik

Hindi nababagay kahit saan

Lalo na sa puso ninuman

Hindi ako ang iyong tipo

Sobra-sobra ang layo

Kaya't hahanga na lang ako

Sa distansyang tanaw ko ang tulad mo

NAIWAN SA NAKARAAN (2022)

 Ilang tula pa ba ang iaalay sa iyo?

Ilang liham pa ba ibibigay sa iyo?

'Di ba ako nagsasawa

Dahil sa iyo ito'y lipas na

Ang dami kong katanungan

Ngunit walang kasagutan

Dahil ako ay napaglipasan

Naiwan sa nakaraan

Nakulong na sa mga rehas

Gawa ng imahinasyong matalas

Kailan kaya makakaalpas sa pagkabiyak

Sa pag-ibig na kupas na ako lang ang humahawak

O SAN HUDAS TADEO (2022)

O San Hudas Tadeo

Pintakasi ng mga nawalan ng pag-asa sa mundo

Samahan kami sa paglalakbay sa buhay na ito

Ikaw ang nagdadala ng sa amin ng dagling saklolo

O San Hudas Tadeo

'Wag hayaang mawalay kami sa Panginoong Hesukristo

Nang mapanatag ang loob naming puno ng pagkalito

Panalangin namin at pagsinta namin ay walang hinto

O San Hudas Tadeo

Sa iyong pagkandili inilalagay namin ang buhay na ito

Saklolohan kami sa karagatan ng kalungkutan sa mundo

Hanggang nandirito sa bayang puno ng tagumpay at pagkabigo

SA ULAP KASAMA ANG AMING YAKAP (2022)

Maningning na tala sa kalangitan

Gabay sa gitna ng karimlan

Ngayon ikaw ay naglalakbay

Patungo sa kabilang buhay

Ngayon kami ay nagluluksa

Nangungulila sa iyong pagkawala

Titingala kami sa mga ulap

Umaasang dala-dala mo ang aming mga yakap

Mahal ka namin, Tati! <3 

Hanggang sa muling pagkikita natin sa kabilang buhay <3

ISKOWENTO: SIMULA NG PAGLALAKBAY BILANG ISKOLAR NG BAYAN (2022)

    Today, we had a meeting with our professor in Intro to Communication and Media; and boy, the connection and discussion was vibrant, spontaneous, and supercalifragilisticexpialidocious. She and my block mates were well-spoken, of course I am within the Mass Comm peeps. She shared with us her unforgettable experiences as an instructor and how PUP excels in producing students with creativity, high-intellect, and professionalism. Students being out-of-the-box in terms of producing output is her absolute delight. Seeing things from different perspective and being on your toes ready to pop your creative juices. Listing our ideas in a notebook or our phones was her tip because we will need many of those as we venture into this program. 

This marks the beginning of my life as an aspiring broadcaster and an Iskolar ng Bayan.

Gagamitin ang karunungang mula sa iyo, para sa bayan.

TAHANAN, SINTA (2022)

Masusumpungan sa simpleng gawa

Ang gusaling may payak na istruktura

Kapag pag-ibig ang s'yang ipinunla

Ang bahay ay magiging tahanan, sinta

FILIPINOLOHIYA AT PAMBANSANG KAUNLARAN ISLOGAN (2022)

 

Mahalimuyak na wika

Pumulas sa masining na dila

Kumikislap na kultura

Sa samu't saring pook makikita 

Ginintuang panitikan

Kwentong 'wag kalilimutan

Magiting na kasaysayan

Sinulat at pinanday ng pag-ibig sa bayan

Ilawan ng karunungang-bayan

Itatanglaw sa lupang tinubuan

ROSARIO (2022)

Sa bawat maliliit na butil ng rosario

Panalangin ang alay para sa mundo

Sa bawat Aba Ginoong Maria

Ang bayang Pilipinas sa 'yo ay sumisinta

Tulad ng bawat isang misteryo

Gayon din ang bumabalot sa buhay ng tao

Mayroong tuwa at hapis

Mayroong liwanag at luwalhating matamis 

Ina namin sa langit 

Ang rosario aming inaawit

Kaya't sa oras ng sa mundong sakit

Saklolo mo sa ami'y ilawit

HALIMUYAK (2022)

Ang bangong humahalimuyak

Iba sa taong sa lupa'y nakatapak

Ito'y mistulang mumunting pakpak

Patungo sa langit na tagumpay ay tiyak

Turuan kami't ilawan munting rosas

Sa langit kami'y ipamintuhong wagas

Nang makawala sa kamunduang posas

Dalhin kami sa Ama na nasa Itaas

Happy Fiesta St. Therese of the Child Jesus!