INANG MARIA (2021)

 Ina ni Kristo at ng tao

Namulaklak at lumago

Ang binhing iyong regalo

Ng pananampalataya

Galing sa langit na tuwa

Masintahin ka Maria

Alalayan po sa lupa

Reyna ng kalangitan

Iakyat kami sa 'yong bayan

At ikaw ay aawitan

SA SIMULA NG KATAPUSAN, SA KATAPUSAN NG SIMULA (2021)

Sa simula ng katapusan

Sa katapusan ng simula 

Sa gitna ng kawalan

Sa gitna ng kakapusan

Sa kabaong inilagay

Ang pabaon na pinaghintay

Sa kamatayan pinaghiwalay

Ang nananumbalik na kulay

Ang landas na nagwakas

Ang landas na nagbukas

Saan dadalhin ng lakas?

Itutuloy ba o tatakas?

MGA NAIISIP KO NGAYONG QUARANTINE 2 (2021)

What's up? Guess what? Quarantine pa rin. 

Itong chikahan na 'to ay part two na ang unang part ay sinulat ko noong April 19, 2021. 

Noong nakaraang tatlong linggo, Agosto 2, 2021, nagsimula na ang pang-akademikong taon 2021-2022 sa aming paaralan. Grade 12 na ako. Grabe, parang kailan lang sumasayaw-sayaw lang ako sa corridor para mapansin ng crush ko, humahalakhak lang ako nang walang katapusan sa canteen, sa classroom, at sa kung saan-saan, at nag-e-enjoy sa aking "high school life". Hays... ang bilis nga naman ng panahon.

Kaninang madaling araw, mga alas-kuwatro, nagising ako, naihi, at 'di na nabawi pa ang aking tulog kaya late ako nagising at 'di nakapasok sa aking homeroom. Online na nga lang 'di pa nakapasok. Kaninang hindi ako makatulog inisip ko na lang ang plano ko sa hinaharap. Isa na doon ang kursong kukunin ko sa kolehiyo. Ang isa sa mga kinokonsidera kong kunin ay Marketing. Ang layo sa HUMSS strand na kinuha ko 'di ba. Iniisip ko kasi na iyon ang kursong kinukuha ng mga mag-a-artista e, feeling artista at superstar naman ako kaya why not? 

Bago rin ako matulog may ritwal pa kong ginagawa. 'Di naman ito pang-kulto kaya don't worry. Naglalagay lang ako ng Vicks sa ilong at sa dibdib (Oo na pareho ng likod 'to). Tapos in-e-exercise ko rin 'yung ilong ko pa-upward motion 100 times. 'Yung bridge din para medyo lumiit. Pero nakaka-relax kasi 'yun kaya halos tatlong buwan ko nang ginagawa. minamassage ko rin 'yung under eyes ko para mawala eye bags na sobrang lusog dati pero ngayong medyo numinipis na... whew. saka 'yung sa brow bone ko minamassage ko rin. Lahat 100 times. Pagtapos ay nag-ko-close-open ako sabay ng pagpikit-pikit saka ng pagpapatunog ng daliri sa paa ('di ko alam tawag sa eme na activity na yan). 

Noong nakaraan pala nagpunta kami sa mga "Pilgrimage Church sa Diocese ng Antipolo" dahil 500 years na ng Kristiyanismo sa Pilipinas. Noong July 9 kami nagpunta. Nagsimula kami sa Antipolo Cathedral, tapos sa Anunciata Parish na pinakamatandang simabahan daw sa diyosesis. Sa Regina Rica naman kami nagsimba at kumain ng tanghalian. Ang haba ng biyahe papunta roon pero worth it naman. Sunod naman ang Our Lady of Light na malapit sa 'kin dahil doon kami lagi nagsisimba noong nag-aaral pa ako sa Cainta at noong tumira kami roon. Tapos sa San Ildefonso de Toledo na paikot-ikot kami kasi nakasarado ang gate. 'Yun pala magsasabi para pagbuksan ng gate. Last stop ang Our Lady of the Abandoned at umuwi na kami. 

Balik sa araw ngayon. Sa nobelang Entablado ('di pa pinal na pamagat pero maganda na naman 'di ba) naisulat ko na ang unang kabanata pero tulad nga nang naipangako ko sa sarili ko na magsusulat ako ng nobela kung nakapagbasa na ako ng sampung nobela. Kumbaga hitting two birds with jackstone (tama ba?) nag-research na ko sa topic na plano kong isulat at natututo pa ako ng istilo sa pagsulat. Nabuo ko na ang mga eksenang gusto ko isulat pero hindi pa siya masyadong ganap, hapyaw pa lang. Wala pa nga rin akong ending sa ngayon e. Kaya iyon muna ang gusto kong pag-isipan, pagnilayan, at pagtuonan dahil karamihan sa mga awtor na napapanood ko na nagbibigay ng tips sa mga baguhan sa pagsulat ay dapat daw na alamin muna ang ending para alam mo kung saan ka pupunta. Kaya 'yon muna ang aatupagin ko.

Sa online class naman may apat na bagong teacher na hindi ako kilala pero okay lang mahaba pa naman ito kaya may panahon pa akong magpakilala. May isa naman pinaglihi ata sa gulo at katamaran. Bago 'yan, disclaimer muna kahit tanungin niyo pa mga ka-batch ko ganon din ang sasabihin nila. Magpapa-repoting na naman siya. Isang malaking awit naman diyan. Naalala ko tuloy na nag-ke-candy crush lang siya pag nag-re-report kami dati. Tas ngayon on the spot siya gumawa ng powerpoint niya, galing 'di ba? Pero natuwa naman ako sa Philosophy teacher namin magaling siya napaka-active at interactive ng lesson/meet niya kahit na patay na oras natapat subject niya (alas-dos hanggang alas-tres).

Nag-birthday din pala tatay ko. Naghanda ng palabok, ng kare kare, saka ng cake at ice cream. Share ko lang hehe.

'Iyon lang naman ang mga ganap sa buhay ko sa ngayon. Hanggang sa muling MGA NAIISIP KO NGAYONG QUARANTINE. BA-bye!

MASKARA, ENTABLADO, AT TEATRO (2021)

 Sa maskara nagkukubli

Ang katahimikang nakabibingi

Sa maskara sasanggi

Ang katotohanang mahahapdi

Sa entablado nagtatanghal 

Ang mga hipokrito't hangal

Sa entablado sumisinghal

Ang mga lipunang pagal

Ang teatrong sumasalamin

Sa kasalanang 'di inaamin

Ang teatrong repleksiyon 

Sa taong nilamon ng korupsiyon

OBRA MAESTRA (2021)

 Ikaw ang pininta

Ako ang taga-pinta

Ng ating pagsinta

'Sing rikit ng obra maestra

Sa kawalan ng kulay

Ikaw ang bahagharing tulay

Na inspirasyon ang bigay

Obra maestrang alay

Isang obra maestra

Ang masinsinan pagkakalikha

Na pag-ibig ang siyang adhika

'Sing husay ka ni Juan Luna

BAKLA! BAKLA! BAKLA! (2021)

 Bakla! Bakla! Bakla!

Tukso sa batang lumuluha

Na kung kumilos ay parang dalaga

Na nasa katawan ng binata

Bakla! Bakla! Bakla!

Tawag ng lalaking nanuntok kanina

Ang mukha kong masaya

Ngayo'y puno na ng pasa

Bakla! Bakla! Bakla!

Mga salitang 'di ko ikakahiya

Dahil dito'y lumaki akong nakatingala

Kahit na pilit akong payukuin ng iba

WALANG PAMAGAT (2021)

Ang pamagat na magkabiyak

Ang salitang bunsod ng pag-ibig 

Ang katagang inaasam masambit

Ang isang bagay na hindi ko makakamit

Tayo man ay magmahalan

Tingin nila ay pawang kataksilan

Taong itatakwil ng tahanan

Tila ka isinuka ng sanglibutan

Magkaroon man tayo ng kwento 

Maisulat man ang pagmamahalang itinago

Mabilis man dumaan ang panahon

Mananatili tayong walang pamagat