"Sa mga mahahalimuyak at makukulay na bulaklak ng aking kabataang naisatitik para sa alaalang aking sasariwain at babalik-balikan."
Sa maskara nagkukubli
Ang katahimikang nakabibingi
Sa maskara sasanggi
Ang katotohanang mahahapdi
Sa entablado nagtatanghal
Ang mga hipokrito't hangal
Sa entablado sumisinghal
Ang mga lipunang pagal
Ang teatrong sumasalamin
Sa kasalanang 'di inaamin
Ang teatrong repleksiyon
Sa taong nilamon ng korupsiyon
Ikaw ang pininta
Ako ang taga-pinta
Ng ating pagsinta
'Sing rikit ng obra maestra
Sa kawalan ng kulay
Ikaw ang bahagharing tulay
Na inspirasyon ang bigay
Obra maestrang alay
Isang obra maestra
Ang masinsinan pagkakalikha
Na pag-ibig ang siyang adhika
'Sing husay ka ni Juan Luna
Bakla! Bakla! Bakla!
Tukso sa batang lumuluha
Na kung kumilos ay parang dalaga
Na nasa katawan ng binata
Bakla! Bakla! Bakla!
Tawag ng lalaking nanuntok kanina
Ang mukha kong masaya
Ngayo'y puno na ng pasa
Bakla! Bakla! Bakla!
Mga salitang 'di ko ikakahiya
Dahil dito'y lumaki akong nakatingala
Kahit na pilit akong payukuin ng iba
Ang pamagat na magkabiyak
Ang salitang bunsod ng pag-ibig
Ang katagang inaasam masambit
Ang isang bagay na hindi ko makakamit
Tayo man ay magmahalan
Tingin nila ay pawang kataksilan
Taong itatakwil ng tahanan
Tila ka isinuka ng sanglibutan
Magkaroon man tayo ng kwento
Maisulat man ang pagmamahalang itinago
Mabilis man dumaan ang panahon
Mananatili tayong walang pamagat
Darating ba ang araw?
Ang araw na malaya nating lalakbayin ang mundo
Ang araw na malayang mahalin ang 'sang tulad mo
Kailan kaya iyon? Maghihintay ako
Maghihintay ako hanggang sa panahon
Ang panahon na sabay tayong tatalon at aahon
Ang panahon na sabay sa pagtulog at pagbangon
Kailan kaya iyon? Sana iyon ay aking abutin pa
Kung ito man ay abutin ko
Labis-labis na tuwa at nag-uumapaw na pag-ibig
Ang siyang maghahari sa nag-iisang nating daigdig
'Di na ako makapaghintay na lasapin ang sandaling iyon.
Kung kasalanan ang sa'yo'y umibig
Bakit kay busilak ng iyong tinig?
Bakit tila ka anghel kung tumititig?
Kung trahedya ang ating pag-ibig
Kung kasalanan ang sa'yo'y magmahal
Araw-araw akong magkukumpisal
Sasamahan pa ng nobena at dasal
Dahil ako ay minsan lang magmahal
Kung isusulat muli ang ating pag-iibigan
Hiling ko sana ay pahintulutan
Na ang wakas nami'y sa isang kasalan
At hindi na sa kasalanan
Ako ay talinhaga Nakagapos sa tanikala Nakabusal ang bibig Nakapiring ang mata Nilisan ng pag-ibig Yaring puso at diwa Ako ay talinhaga Na...