PAG KINALABIT KA, TATAKBO O SASAMA KA BA?

Nang may biglaang kumalabit

Si Kamatayan ay lumalapit

Ang dibdib sumikdo't namilipit

Pwede ba manlimos kahit isang saglit ulit

Hinahabol-habol niya ako ngayon

Samanatalang hinahanap siya kahapon

Ngunit 'di niya pa ako matataya

Dahil marami pang 'di nasabing salita

Ngayo'y nahihirapan nang huminga

Na dati'y pinipigil pag lumuluha

Bakit pag gusto ay umaayaw bigla

Pag kinalabit ka, tatakbo o sasama ka ba?

PS:

Kasi kala ko matetegi boom na ako kanina sa Cubao kasi sobrang sakit ng dibdib ko kala ko heart attack. Kaya ayun dasal lang ako nang dasal na sana makauwi ako at hindi humandusay. Thank you Lord at 'di ako namatay today!

KAMAHAL-MAHALANG PUSO NI HESUS (2025)

 Ang aking puso rin ay tigib ng hapis

Kung maaring ilayo na yaring kalis

Ngunit pagkalooban po ako ng pagtitiis

Lakipan din po pag-ibig na walang mintis

Yaring puso ay nabalot ng maraming sugat

Natatarakan din ng isang matalim na sibat

Pagmamahal na dumaramay sa ligalig

Sa diwang tahimik, palaging nakikinig

Ang iyong pusong mahal na lipos ng habag

Ako'y dadalangin kahit na sa isip ay labag

Pagkat ikaw po ang natatanging kaibigan

Sa anumang pagsubok, ako'y hindi iiwanan

KOMPLIKADO (2025)

Kapag tumibok ang puso

Nagiging komplikado

Hanggang mahulog nang buo

Sobrang delikado

Tinawag na lahat ng santo

'Di pa rin desidido

Lagi pang tumatakbo't lumalayo

Kaya mas nagiging komplikado

May pag-asa bang totoo

Bakit nakakalito

Ang kwentong komplikado

Hanggang ganito ba hanggang dulo?

Sana maayos mo

Para 'di maging komplikado

Kahit piliin mo'y 'di ako

Ayos lang, sarili ay unahin mo

PS

Bakit ka nagdeactivate??? I hope you're okay and hindi ito tungkol sa akin. Pero kung tungkol sa akin ayos lang kahit 'di mo ko piliin. Piliin mo sarili mo!

LAGI NA LANG AKONG TUMATAKBO

Lagi na lang akong tumatakbo

Habang ang mundo ay lumalayo

Nais niyo ba akong magbago

Kahit wala naman mali sa'king pagkatao

Lagi na lang akong kumakaripas

Kaya't 'di namamalayang lumilipas

Ang matuling pag-andar ng oras

Naiisip ko lang na ako ay malas

Lagi na lang naglalakad nang matulin

Ang hirap-hirap niyo kasing habulin

Wala kasing nagpapaiwan para intindihin

Ako at ako na lang ang laging sisisihin

Lagi na lang akong napapagal

Kaya't ang puso ay hinihingal

Ganon ba kahirap ang magmahal

Kaya ako ay laging nasasakal

Pwede ba akong huminto kahit saglit

Pag tumigil, ako ba ay ipagpapalit

Isipin niyo naman minsan naging paslit

Para pagmamahal ninyo'y 'di ipagkait

KABUTE (2025)

 Mawawala ka na lang at babalik

Magsasalita tapos 'di iimik

Lilitaw at lulubog ang lintik

Dati ka bang kabuteng may saltik

Eto naman ako laging naghihintay

Dito na yata ako mamamatay

Isang kanta, isang ngiti, mabubuhay

Para kang kabuteng umaahon sa hukay

Hanggang sa 'di na kita iniisip

Kaya't dinadalaw mo na ako sa paniginip

Andito lang naman ako pag ika'y nainip

Ikaw ang kabuteng nagtatago't sumisilip

ANINO (2025)

Nawala na ang aking anino

Sumusunod na pala sa iyo

Minsan masyado 'yang pilyo

Madalas namang nagpapakatotoo

Ang kakambal kong kadiliman

Walang sumusunod, walang sinusundan

Lumalabas lang pag naarawan

Nawawala naman kinagabihan

'Yan na nga lang ang meron ako

Napunta at napunta pa rin sa iyo 

Pwede mo bang ibalik ang aking anino

Dahil ngayon nag-iisa na lang ako

SINO NGA BA ANG DAPAT KONG KAMUHIAN? (2025)

 Mas natatakot ka pa sa dilim

Kaysa ako'y mapalayo't maging malihim

Mas kinatatakutan mo pa ang multo

Kaysa ako ay mapariwara sa mundo

O sino nga ba ang dapat kong kamuhian

Ang kabutihan ba o ang kasamaan

Kasi sa aking panimdim at paningin

Parang parehas lang naman kung iisipin

Mas natatakot ako ngayon sa hinaharap

Dahil pinatay mo ang aking pangarap

Mas kinatatakutan ko ang manatili

Sapagkat sa akin ay walang umiitindi

O sino nga ba ang dapat kong ikapangamba

Ang unti-unti ko paglapit sa pagtanda

O ang dahan-dahang pagmamartsa

Patungo sa lugar na masaya pero wala ka

BAKIT BA KAHIT MATULOG AY PAGOD PA RIN? (2025)

 Bagay ba sa leeg ang kwintas na lubid

Maganda kasi ang pula sa laman at litid

Tas iinumin ko pa 'yung muriatic acid

Walang makakaalam, walang nagmamasid

Bagay ba akong humandusay sa kalsada

Lasog-lasog ang bawat kalamnan at bituka

O kaya magbabad sa ilalim ng karagatan

'Yung tipong wala na akong hihingahan

Bakit ba kahit matulog ako ay pagod pa rin

Kahit ngumiti nakakaubos ng damdamin

Wala namang dumadamay, walang aakay

Mabuti pa siguro ako na lang ay humimlay

WALANG UMIIMIK (2025)

Walang umiimik

Paligid ay tahimik

 Lalamuna'y may tinik

'Di rin makatitig

Dumadalaw ka

Sa aking diwa

Hindi nagsasalita

Lumalayo ka na ba?

Ang labo-labo mo kasi

Pati sa panaginip, 'di mapakali

Ano ba talaga ang sinasabi?

Lagi na lang ba ako iintindi?

PS: Napaniginipan ko siya nagsimba raw ako tapos andon siya nag-pi-piano. Nagkatitigan kami tapos ayun na. First time ko siya napaniginipan. 

AYOKO MUNANG IDILAT ANG MGA MATA (2025)

Ayoko munang idilat ang mga mata

Tutuyuin ko muna ang aking luha

Kailan kaya gigising sa isang umaga

Ang pagod ay wala, meron lang ay pahinga

Babangon kaya muli ng bitbit ay pag-asa

Hindi ang madlang takot ko at pangamba

Binabalot ng marami kong pagdududa

Bumabaluktot sa mumunti kong kama

Sisikatan kaya ako ng dakilang haring araw

Bago ako lagutan ng hininga sa pagpanaw

Tulad ni Icarus na ang pakpak ay natunaw

Sa aking pagbagsak, masaya akong hihiyaw

HINDI MO NAMAN AKO KAILANGANG MAHALIN (2025)

Hindi mo naman ako kailangang mahalin

Ang nadarama mo'y 'di naman kailangang sabihin

Hindi rin naman kita kukulitin at pipilitin

Ang tanging hiling sana'y hayaan ako sa aking lihim na pagtingin

Hindi naman natin tatakbuhin nang matulin

Kahit na hindi ako ang iyong piliin

Huwag na huwag mo lang sana akong lituhin

Hihiling na lang ako sa buwan at bituin

Sa aking buhay, kung saan man ako dalhin

Sa aking loob-loob, sana ay sa iyo pa rin

Kung hindi man, laman ka pa rin ng panalangin

Ang iyong kaligayahan sana ay kaniyang dinggin

KUNG HINDI TAYO PWEDE SA BUHAY NA 'TO (2025)

Kung hindi tayo pwede sa buhay na 'to

Baka sa susunod pa tayong habangbuhay

Hanapin mo na lang ulit ang ikaw at ako

Para ang kwento natin malagyan ng kulay

Pag ako ay babae na at ikaw nama'y lalaki

O kaya ako ang lalaki at ikaw ang babae

Pwede rin namang pareho tayo ng kasarian

Dahil ang magmahal ay hindi kasalanan

Hindi naman natin maisisik ang sarili

Kung parehas nating hindi pinipili

Ang magmahal sa gitna ng pangyayari

Sa tadhana na lang ba natin isisisi?

BULALAKAW (2025)

Sa kalangitan may kumikislap, kumikinang na bulalakaw

Sinusundan ng tingin hanggang sa hindi na matanaw

Hinahanap kung saan bumagsak doon lang pala sa Cubao

At ang aking natagpuan at napagmasdan, walang iba kundi ikaw

Kahit minsan akong nawala, minsang nanaghoy, minsang naligaw

Sa madilim at mapanglaw na gabi, ikaw ang nagsindi ng ilaw

Mas maliwanag, mas matingkad, mas mainit pa sa araw

Ikaw ang biglang dumating sa kalangitan ko ang nag-iisang bulalakaw 

Ako ang bumulusok at nagpatihulog nang ikaw ay biglaang lumitaw

Gaya ng gumuguhit sa malawakang kalawakang bulalakaw

Ang pusong pihikan ay tumibok, ang puso ay kusang binigay sa magnanakaw

Humiling sa buwan, bituin, at bulalakaw na ang malabo'y unti-unting luminaw

PAANO BA AKO MANGHUHULA? (2025)

Paano ba ako manghuhula

Kung ano ang 'yong nadarama

Tao, Lugar, Hayop, Pagkain, o Bagay ba?

Ano ba talaga ang kategorya?

Kung 'di ka sigurado latkatawan muna

Babalikan na lang natin pag may oras pa

'Di mo naman kailangan maging Henyo

Para malaman nilalaman ng puso

May kutob at pandama naman ako

'Di ako manhid na katulad mo

Na basta-basta na lang lumalayo

Parang hindi ikaw ang nagbigay-motibo

Napapagod na akong manghula

Nauubos na pag-iisip kung meron ba

Kasagutan sa bawat katanungan

Kasiguraduhan ba o kalituhan

Sagutin mo naman ako kung oo o hindi

Para 'di nanlalabo ang aking pag-intindi

VERTIGO (2025)

Magpaparamdam ka

Ta's bigla na lang mawawala

Magpapahiwatig pa

Ta's ako nama'y umaasa

Para kang vertigo

Pinapaikot mo ang aking mundo

Kaya ako'y nahihilo

Nalilito kung ano ba tayo?

Hanggang tuluyang magsawa

Maglalaho sa isang kisapmata

Ano pa ba ang aking magagawa?

Baka ito talaga ang tinadhana

Paano ba gagaling pa

Ang vertigo kong malubha na

Pero ako'y nasanay na

Sa pagpapaikot mo sa tuwina

Sa bla bla bla bla

Sa malabo ay okay na

Sa wala wala wala

Sanay na sanay na

HINDI NAMAN KASI DAPAT AKO NALILITO (2025)

Siguro nga lumalayo ka na

Nabalot ka na ng pangamba

Alam kong ako ay kakaiba

Ngunit wala namang mali sa'kin, 'di ba?

Tinangay ka na siguro ng hangin

Kasabay ng aking mga dalangin

Dapat siguro hindi na lang umamin

Para kahit papano natatanaw ka pa rin

Susulyap na lang ako sa malayo

Sa paglubog ng araw ng ating mundo

Hindi naman kasi dapat ako nalilito

Hindi ba malinaw na wala namang tayo

LUMALIM NANG LUMALIM ANG BUNTONG-HININGA (2025)

Lumalalim nang lumalim ang buntong-hininga

Hinuhukay nang hinuhukay ang kaibuturan ng kaluluwa

Tumambad ang bangkay na naagnas na

Umaalingasaw ang masangsang na diwa

Humihiwalay na ang isip sa aking mga paa

Naglalakad sa gitna ng kalsada

Ang mga kotse ang binabangga

Nabundol sa matagalang pagkatulala

Nalunod sa karagatan ng luha

Wala man lang naghagis ng salbabida

Lumulutang, lumulubog, lumalansa

Nananadyang umiwas ang lambat ng mangingisda

BAKIT??? (2025)

Bakit natin binibilang ang bituin

Para lang umiwas ng tingin

Bakit tayo nagtatagu-taguan

Sa ilalim ng maliwanag na buwan

Bakit natin ipinaparamdam

Ang damdaming tayo lang ang may alam

Bakit tayo laging naiilang

Kaya naiiwan ang isang lumulutang-lutang

Bakit natin nililihim at itinatago 

Ang nilalaman ng ating mga puso

Bakit tayo laging naduduwag

Ang ating kwento ba ay maglalayag

SIRENANG 'DI LUMALANGOY (2025)

Kung ang lumikha ay pag-ibig

Bakit ang pagmamahal ko'y inuusig?

Paano lalago ang buong daigdig

Kung ang isang halama'y walang dilig

Kung tatalikuran ang aking hinaharap

Pikit-mata akong mangangarap

Yayaman ako sa aking paghihirap

Sa kadiliman ng mundo, kikislap-kislap

Sa karagatan ng sandaang buhay

Ako ay sirenang 'di lumalangoy

Anurin man sa malalim na hukay

Tahimik akong aasa kahit nananaghoy

SA BAWAT AWITING NAPAPAKINGGAN (2025)

Sa bawat awiting napapakinggan

Ikaw na lang ang laging iisipin

Ngunit wala ka na, 'di na kapiling

Ikaw ay mananatili na lang na hiling

Kahit sa aking pagpapahinga

Dumadalaw ka pa sa panaginip

Dumudungaw ka sa gabi't umaga

Sa aking pagkabagot at pagkainip

Dumadapo ba ako sa iyong isipan

Kung hindi, ako'y nag-iisa na naman

Kailan mo ba ako lulubayan?

Gusto nang lumagay sa katahimikan

IKAW AT AKO (2025)

Pwede pa ba nating ipilit

Mukhang wala na 'to

Baka meron nang sumingit

Sa pagitan ng ikaw at ako

Ayaw ko pa namang nagpupuyat

Pero basta ikaw ay ayos lang

Pumupurol na ang panulat

Ikaw at ako pa rin ay naiilang

'Di kita mabasang talaga

Para kang libro sa matematika

Ano bang solusyon sa problema

Kung aamin ako, ikaw rin ba?

MAWALA, MAGWALA, MANIWALA (2025)

Nais kong mawala sa mundo

Isang segundo, isang minuto

Isang araw, isang linggo

Hahanapin mo kaya ako?

Nais magwala ng aking puso

Sumigaw, sumabog, sumikdo

Huminga, huminahon, huminto

Mauunawaan ba ako?

Nais kong mawala, magwala, maniwala

Maniwalang may puwang ang ako

Sa isang sandaigdigang pilit sinusuka

Ang aking paglalantad at pagpapakatotoo

KASALANAN (2025)

Ikaw ang kasalanang uulitin at sasadyain

Hinding-hindi bibitawan, kakapit pa rin

Ikukumpisal pero may kaunting pabitin

Sa mandarayang tukso, ako ay lapitin

Kung mapupunta man ako sa impyerno

Dahil sa aking pagmamahal sa tulad mo

Hindi ito maipagsisino ng anghel at santo

Pagkat ang sala ko lamang ay umibig sa'yo

Nais kong malaman mo na kahit gumuhit

Sa puso ang damdaming mahapdi't mapait

Hinding-hindi sumagi sa isip na ipagpapalit

Ang ikaw sa panahong may galak at sakit

Lalakad ng paluhod sa altar ng simbahan

Kahit isuka man ako ng sangkalangitan

Ang kasalanan kong ito na pagmamahal

Aking taos-pusong aakuin at ikukumpisal

BAWAL O PWEDE? (2025)

 Pwede mo naman akong kausapin

'Di naman kita dededmahin

Ikaw pwede ba kitang kausapin

May gusto lang sana akong linawin

Siguro ay ayos ka na sa ganito?

'Yung nakakalito, 'yung malabo?

Hayaan na lang ba natin ang mundo

Kung tayo talaga, muling magtatagpo

Kaso kasi naiwan natin sa ere

'Di sigurado kung bawal o pwede

Nasa gitna pa rin kung mananatili

Kahit walang katiyakang mapipili

NASAAN KA NA BA? (2025)

Naiiwan akong mag-isa

Gano'n ka rin naman pala

Bakit ba natin pinili?

Ang sa sarili'y manatili 

Nasaan ka na ba?

Andito lang naman ako

Heto naghihintay sa wala

Nilulunod ang sarili sa trabaho

Ayaw mo ba talaga tayo?

O baka ayaw mo lang ako

Meron ka na yatang ibang gusto

Ayos lang, sanay naman ako matalo

Nasaan ka na ba?

Andito pa rin naman ako

Heto naghihintay na naman sa wala

Umaasa na naman ako sa'yo

KANDILING-ULAP (2025)

Sumikat ang araw

Naaninag ang sikat

Walang ulap na matatanaw

Magdamag na dilat

Hanggang sa kumilimlim

Namuo ang mga ulap 

Sumilong muna sa limlim

Hinintay tumila ang luha ng alapaap

Hanggang sa lumiwanag ang langit

Ngunit hindi na muling napagmasdan

Isang kandiling-ulap, isang saglit

May bahaghari kayang maaabutan

MY NAME, YOUR NAME (2025)

I hope when you see my name

You'll remember how we play the game

You'll change, but I'll always be the same

I hope when I see your name

I will forget that I was never your aim

But my heart is always for you to claim

WHY DO YOU GIVE ME VIBRANT COLORS AND EXPECT ME TO BLEND? (2025)

Always the odd

Never the even

Thrown in the mud

Twenty- four seven

Why do I always have be on the hate's receiving end

Why do you give me vibrant colors and expect me to blend

I will not adjust anymore, I will not backward bend

I will stay true to my core, I will no longer pretend 

Beat me down

I will be rising from the ground

Banish me from town

I will leave without a sound

Why do I always have to be on indifference's receiving end

Why do you give me striking colors and expect me to blend

I will not adjust no more, I will not backward bend

I will stay true to who I am, I will never ever pretend

KUNG AKO MAN AY TAHIMIK, DINADAAN LAHAT SA TITIK (2025)

 Kung ako man ay tahimik

Dinadaan lahat sa titik

Doon puso'y nagtitirik

Ng kandilang nanabik

Kung ang bibig ay 'di mangusap

Magdurugo na lang ang kaibuturan

Ang pusong laging nangangarap

Na marating ko na ang kalangitan

Bagaman ako'y nanahimik

Asahan mong sumisigaw ang titik

Ang siyang piping humahalik

Sa damdamin kong matalik

INA NG WALANG MAG-AMPON (2025)

Ina ng Walang Mag-ampon

Ako ay iyo pong ampunin

Para gabayan sa tamang direksyon

Sa pag-ibig na kakalingain

Balutin mo po ako ng lampin

Ng iyong liwanag at aruga

Ako po ay inyong dalhin

Sa langit na pugad ng galak at grasya

Sa mundong mabigat sa dibdib

Suliranin ko'y inyo pong pinagaan

Kahit ako man ay magtago sa liblib

Inang Maria, ako iyong matatagpuan

HE CAN BUT HE DIDN'T (2025)

He can but he didn't

His love is not hidden

It is non-existent

So it's time to start erasing

This lonely feeling

He is his own person

And it will definetly worsen

If I don't stop loving him

I'll be the only victim

In this unrequited hymn

He can but he didn't

Why am I still chasin' the footprint

He left behind

And all those memories remind

But I will no longer rewind

MAGING ANTAGONISTA KAHIT IKAW NAMAN ANG NAGSIMULA (2025)

Kung ayaw niyo sa akin, edi 'wag

Bahala na talaga, hindi na ako papalag

Akala mo naman may kung anong nalabag

E 'yung ugali mo naman 'yung balagbag

Isarado ang pinto nang mabuti

Siguraduhing kandado'y mahigpit, matindi

Ayos lang maiwan mag-isa ngayong gabi

Bangungot ko'y nagbabalat-kayong mabuti

Kung mahimbing ka sa aking pagkabalisa

Susuko na lang, baka ako'y sumpain mo pa

Iyon na siguro ang sa akin ay itinadhana

Maging antagonista kahit ikaw naman ang nagsimula

NAG-AABANG SA KAWALAN (2025)

Sa paghihintay ako'y nagkauban

Ang tanong sa'kin, hanggang kailan?

O dapat bang katanungan...

Ay nag-aabang ba ako sa kawalan?

Nagdarasal sa sangkalawakan

Para lang mahanap ang kasagutan

Mag-isa na lang ba ako sa walang hanggan?

O mag-aabang pa rin ako sa kawalan?

Ikaw ang alin sa pag-aalinlangan

Ako ang kasi sa walang kasiguraduhan

Sa mundong ito na walang katiyakan

Heto ako at nag-aabang sa kawalan

ANG MISYON KO LANG BA AY MAGING KONSUMISYON? (2025)

Tirisin mo ako na parang insekto

Tiisin mo ako na parang gutom

Tadtarin mo na rin ako ng martilyo

Ta's budburan ng asin para 'di maghilom

Putulin mo ang aking dila ng kutsilyo

Tahiin ang bibig gamit ang pang-gantsilyo

Pahiran mo na rin ako ng gasolina

Sindihan mo nang tuluyang masunog na

Sugatan mo pa ang aking loob

Sungitan mo lagi para sa bangka'y tumaob

Sabihan mo na rin ng mga salitang kulob

Ta's pag gumanti ako pa 'yung walang utang na loob

Ang misyon ko lang ba ay maging konsumisyon?

Pagkat bawat galaw ay laging maling desisyon

Tutal naman ang iyong mga samo, litanya, at petisyon

Ang mawala ako sa sarili at lamunin nang buo ng ilusyon

POLITIKO (2025)

Sabi mo gusto mo maging politiko

Kaya pala sa'kin ika'y nangandidato

Dinaan ako sa mabulaklak mong salita

Sinamahan pa ng ngiti mong pang-plaza

Wala ka namang ipinangako 

Sinabi mo lang na ika'y mabuting tao

Pero bakit sa'yo pa rin ang aking boto

Ikaw ang trapo at disnatiya ng aking puso

Sa eleksyon hangad natin ang totoo

'Di korapsyon, bagkus platapormang buo

Pero sa'yo pa rin ang boto sa presinto

Ako ang naghabol pero ikaw ang tumakbo

NAMIMISS (2025)

Namimisss na kita, Juan

Pero natitiis mo nga ako, ewan?

Kaya titiisin ko rin 'di magpaalam

Hanggang kailan? 'Yun ang 'di ko alam

'Di mo naman kasalanan

Na ikaw ang aking natipuhan

Kaya sana 'di ka na maguluhan

Ayos lang kung 'di mo ako magustuhan

Bakit ko ba kasi inamin

Ang nililihim kong pagtingin

Bakit 'di ba natin linawin

Kung ano ang tunay na meron o wala sa'tin

HATINGGABI (2025)

 At sa pagsapit ng hatinggabi

'Di mo man lang ba ako naiisip

Hanggang sa liwanag ay mapundi

'Di mo man lang ba ako napapanaginip

Mayroon ba akong hinihintay?

Pagkat ako ay nilalamon ng pagkainip

Wala na ba talagang pag-asang ibibigay

Na sa pagkabagot ko sa buhay ay sasagip

Sana pag liliwanag ang gasuklay na buwan

Sana ako ang nasa isipan, napapaniginipan

Doon ay 'di na ako gigising pa kailanman

Dahil do'n lang kita makikita't mahahagkan

VERTIGO (2025)

Umiikot-ikotang paligid

Mga luha sa mata'y nangingilid

Mga paningin ko ay tila lumalabo

Ako na yata ay navevertigo sa'yo

Akala ko may ibig sabihin

Ang mga pinag-usapang damdamin

Kaya paisa-isa, dahan-dahan kong inamin

Kaya ngayon nahihilo nang ako'y lisanin

Nasusuka, ngunit ang sinuka ay ang salita

Na sana ay tayo na lang dalawa

Bakit ko ba ginawa? Ika'y lumayo

Ako naman dito ay nahihilo, natutuliro 

BIRHEN NG ANTIPOLO (2025)

Ang bawat sugat

Iyong binibigyang-lunas

Hinihilom bawat peklat

Para sa bagong bukas

Ang bawat karamdaman

Handog sa amin ang kagalingan

Bigat sa kalooban

Tinutulunga kami sa pagpasan

Ang aming inang umaakay

Sa aming paglalakbay

Dito sa bayang kahapis-hapis

Kami iyong hindi matitiis

IKAW (2025)

Sa sobrang init

Nalulusaw, natutunaw, nauuhaw

Tayo'y hinog sa pilit

Ako, ako, ikaw, ikaw

Tinagong damdamin

Niligaw, niligaw, niligaw

'Di na dapat inamin

Ang gusto ko ay ikaw, ikaw, ikaw

Kung maibabalik ang dati

Malinaw kong nililinaw

Na wala akong pasintabi

Pinili na ay ikaw, ikaw ikaw

APOKALIPSIS (2025)

Kumukulog, kumidlat

Nagagalit ang kalagitan

Bakit ba kasi ayaw mo sa'kin

Pwede ko pa bang pilitin

Sumasayaw ang mga puno

Tinatangay pati aking puso

Bakit ba nahulog sa'yo

Ginayuma mo yata ako

Bumabaha ng aking luha

Inaanod na ang aking diwa

Ginagunaw na rin ang aking mundo

Bakit 'di ka ba mawala sa isip ko?

Ikaw ang Henesis

Ikaw rin ang Apokalipsis

Ikaw ang sisira ng aking daigdig

Dahil lang sa pag-ibig

MABUTING TAO (2025)

Nabasa mo na ang mga sinulat 

'Di ka man lang ba nagulat

Nagustuhan mo ba talaga ang mga tula

O ngumiti ka lang dahil mabuti kang tao

'Di ko kailangan ang awa, ang pasensiya

Gusto ko unawain, may gusto ka ba sa 'kin?

O siya at siya pa rin ba talaga?

Wala na ba akong magagawa?

Mas gugustuhin ko pa makita kang gago

Nang mapapalitan ng galit sa 'king puso

Pero bakit pinili mo maging mabuting tao

Ako tuloy ang nahihirapang lumayo

NILILITO MO LANG BA AKO? (2025)

 Iniikot-ikot mo

Kaya nahihilo

Bakit ba ako sumakay sa'yong tsubibo?

Sinabi ko naman sa'yo

Pinilit-pilit ko

Kahit hindi ako ang iyong gusto

Tumataas, bumaba

Naduduwal akong bigla

Dapat 'di na ako sumama sa iyong gala

Pinipikit aking mata

Dahil ayoko makita

Na kahawak kang kamay na iba

Akala ko masaya magpaikot-ikot

Akala ko kaya ko ang iyong pasikot-sikot

Pero ano ang iyong dinulot?

Sumasakit ang ulo, 'di naman ako sexbomb

Kumikirot ang puso, kahit 'di na-lovebomb

Ewan ko sa'yo, nililito mo lang ba ako???

ULSER (2025)

Nalipasan na ng gutom 

Napanisan na ng laway

Sa alak ng buhay umiinom

Naiinip sa tagal na paghihintay

Umiikot ang sikmura

Pag ikaw ang nakikita

'Di alam kung ako ba o siya

Pero ayoko nang umasa pa

Ikaw ang sugat ng taggutom

Kailan kaya maghihilom

Magpapaalam kahit 'di naman nagbatian

Magpaparaya kasi ako ay di nagustuhan

GUSTO KO MAGTAMPO SA'YO TADHANA (2025)

Gusto ko magtampo sa'yo tadhana

Bakit mo pa siya pinakilala?

Kung kami naman ay magiging alaala

Na mahirap balikan, mahirap pa bitawan

Paano kita makakalimutan?

Kung ang iyong pangalan

Ay nasa sikat na pandesalan

Dito sa Marikina na aking tahanan

Oras, paano mo ako lilipasan?

Kung ang pagsilay ay ginagawan

Ng kung anu-anong palusot at paraan

Lagi mo namang pinagbibigyan

Kaya't magtatampo na lang ako

Sa tadhanang sanhi ng aking pagkalito

Ako ay paikot-ikotin pa ninyo

Hanggang sa tuluyan na lang ako mahilo

HININGA, PAA, AT LUHA (2025)

Lumalim nang lumalim ang hininga

Hinuhukay ang kaibuturan ng kaluluwa

Kaya't tumambad ang bangkay, naagnas na

Umaalingasaw ang masangsang na diwa

Humihiwalay ang isip sa aking paa

Naglalakad sa gitna ng kalsada

Ang mga kotse ay binabangga

Hanggang mabundol sa pagkatulala

Nalulunod sa karagatan ng luha

Wala man lang naghagis ng salbabida

Lumulutang, lumulubog, lumalansa

Nananadya ang lambat ng mangingisda

PURGATORYO (2025)

'Di ako mabait, 'di ako masama

'Di ka rin naman demonyo o santo

Pinagbabayaran natin ang sentensiya

Sa kalagitnaan tayo nasa purgatoryo

PILIT (2025)

Inilalayo ka ng langit

Kahit ako ay lumalapit

Ang puso tuloy ay naiipit

Nahihinog sa pilit

Pinipili-pili mo siya

Pinipili-pili ko ikaw

'Di umaayon ang tadhana

Natutuyot, nauuhaw

Bakit ka pa umaawit

Ang tugtog ginagamit

Pareho naman tayong may lawit

Lawit ang dila kakapilit

Walang ako sa harana

Kinukulang sa kapalaran

Walang ako sa mga tala

Pinaglalayo ng kalawakan

PS:

'Wan ko ba? I mean supposedly kikiligin ako right? Pero talagang kinalyo at minanhid ako ng panahon kanina. Siguro kasi nag-cope na ako agad. 'Di ko lang gets bakit sinabi na nambababae at nanlalalake proudly HAHAHA. Well, you do you. I'll do me. Pero naging realistic lang tingin ko sa pag-ibig talaga. I mean kinilig (22 percent) ng kumanta sila on the spot. Pero 'yun na 'yon.

AKO ANG MASOKISTA; IKAW ANG SADISTA (2025)

Ako ay masokista

Ikaw ay sadista

Tayo'y itinadhana

Saktan mo lang ako, ang aking puso

Hanggang magsawa ka sa gusto mo

'Di ko inaalintana

Dahil ako'y ang masokista

Ikaw naman ang sadista

Tayong dalawa ay para sa isa't isa

Tadyakan mo ako ng iyong pag-iwas

Sikmuraan mo na rin para patas

Ako pa ang hahabol sa'yo

Pagkat ako ay masokista

Ikaw ang paboritong sadista

Hanggang kamatayan na ito

INA (2025)

Alam kong may Diyos

Pagkat minahal mo ako nang lubos

Ikaw ang siyang pinadala

Para pag-ibig Niya'y maipadama

Binalot mo ng lampin ng aruga

Pinaliguan ng mga pangaral

Hinehele ng pangarap at pag-asa

Pinapawi ang sa mundong pagkahingal

Ikaw ang inang handog ng itaas

Yapos mo ay palaging nasa puso

Babaunin ko sa bawat landas

Sa aking paglalakbay sa mundo

MABATHALANG AWA (2025)

Saan man ako magtagong sulok

Natatalastas mo, O Diyos, ang aking silid

Ang iyong pagmamahal ay pumapasok

Sa aking pusong kahit ito'y nakapinid

Hindi man umusal ang aking bibig

Malunod man sa dagat ng pag-aalinlangan

Nililigtas ako ng iyong dakilang pag-ibig

Hinihilom ang sugat ng aking nakaraan

Nananalig ako sa iyong Mabathalang Awa

Ang tanging moog ko at tanggulan

Isa lamang akong hamak na balana

Sa lupa, huwag sana akong pabayaan

PURGA (2025)

'Di ka maalis sa isip ko

Para kang isang bulate

Nandito ka pa sa aking puso

Para kang sanlibong kiti-kiti

Kailangan na kitang mapurga

Sa aking buhay, sa aking sistema

Idudumi na lang kita sa may eskinita

Doon siguro makakalimutan na kita

Pero paano pag malala na

Kinain mo na aking laman-loob

Tuluyan na akong nadisgrasya

Ang isip ko ay bigla nang tumaob

Kailangan na kailangan na kita

Mapurga sa aking buong sistema

Kung hindi ako'y tuluyang masisira

Pero pa'no pag wala ka na?

FIRST BOOK OF THE BIBLE (2025)

First book of the Bible

You started the cycle

 Of my endless longing 

Your sweet, sweet loving

Oh you beloved apostle

A creature shining, bedimpled

Melodies of your hymn

But you love a her, not a him

Why did angels sent you?

If our story drowned before it do

All the rainbows of promises

Now, it's just us and farewells

YOU WOULD CHOSE A GIRL (2025)

The way you look at her

The way you look at me

It's different each time

Our glances met separately

Cause I know you would choose a girl

Over a boy that really loves you

I know it's really sad

But, I can't even argue

I badly wanted it to be you

But you did not even want me

And how I can fight the feeling

I want you to hurt me

Cause I know you would choose a girl

Over a boy who really loves you

Do I have to accept it now?

Cause I don't have the strength to argue

'DI AKO BABAE (2025)

'Di ako babae

Kaya iwan mo na ko sa ere

Do'n ka sa kanya

Magsama kayong dalawa

Sana 'di ka rin niya mahal

Para pareho tayong masasaktan

Kahit gumawa pa ako ng ritwal

Basta 'di kayo magkatuluyan

'Di nga ako babae

'Di ba talaga pwede?

Baka magustuhan mo rin naman ako

Kung pagbibigyan mo

Ano ba ang meron siya?

Kaya nahulog ka sa kaniya?

Nakakatawa naman ako

'Yun nga lang lalaki tayo pareho

'Di naman talaga ako babae

'Di talaga ako sinuswerte

Naging bading, naging bakla

Nagmahal pa kahit talo na sa simula

 

'DI MATAMIS (2025)

 Gusto ko 'yung 'di masyadong matamis

'Di masyadong maalat, 'yung sakto lang

'Yung tipong lagi niya akong namimiss

Ikaw ang linamamam sa buhay na matabang

Hahaluin ko para makuha ang tamang timpla

Tatansiyahin ang bawat rekados para tamang lasa

Ganoon ba kapag nagmamahal, para kang umaawit bigla

Ang bawat tibok ng aking puso ay himig ng pagsinta

Kaso sa tinatagal-tagal, ang pag-ibig napanis

Kaso imbes na itong damdamin ay mapalitan ng inis

Bakit ikaw pa aking hinahanap at namimiss?

Kahit hindi ako gusto, handa akong magtiis

ALENA (2025)

Binigay ang brilyante ng tubig

Nalunod sa sobrang pag-ibig

Gusto lang magmahal, bumuo ng pamilya

Ngunit ang tadhana ko ay parang si Alena

Ikaw ang siyang gusto ni Ybarro

Wala na akong magagawa, mababago

Ikaw ang reyna, ikaw ang inibig

Sa'yo Amihan umiikot ang daigdig

Bakit ba kaparis ko ang tadhana ni Alena?

Gusto lang umibig, gustong magkapamilya

Ayaw maging reyna, kaya sa huli'y naging reyna

Ngunit naiwan namang mapanglaw at nag-iisa

Sadya bang tinalukuran ni Emre

At sa pag-ibig, ako ay isang pobre

Sana 'di ko na lang natutuhan ang..

Umibig sa'yo mandarayang nilalang

AKALA (2025)

AKALA KO...

AKALA LANG PALA...

NARAMDAMAN KO NA...

AKIN PANG BINALEWALA...

SABI KO NA NGA BA...

SINO NGA BA AKO SA KANIYA?

WALA...

DAHIL ANG GUSTO AY SIYA...

PS:

Tama pala ako hayop na 'yan! HAHHAHAHAHAHHA 

NEVER TALAGA NAG-FAIL ANG INTUITION KO

PENGE NGANG PANG-TUITION

PARA KAY JUAN (2025)

Ang hirap magkagusto sa may sariling mundo

'Di mo alam kung saang lupalop nagtatago

Kung saan ba siya nagsuot na kweba  

O baka lumagay na siya sa ilalim ng lupa 

PAANO KO ITO MATATAPOS? (2025)

Paano ko ito matatapos

Gayong mga salita'y kapos

Puso ko ay pinupulbos

Hingal at naghihikahos

Pano natin mayayapos

Ang karanasang lubos

Kung tingin lang binubuhos

Dalawang torpeng nagtuos

Ang tula kaya'y matatapos

Bago ang tinta'y mapaos

Sa ngiting sa puso ay taos

O sa pusong sakit ay tagos

MAG-ISA TAYONG DALAWA (2025)

Alam mo, sanay naman akong mag-isa

Pero noong dumating ka, ewan ko ba

Gusto na kita, gusto na laging makita

Malay mo tayo pala talagang dalawa

Pero sanay ka rin yatang mag-isa

Sa sariling mundong iyong nililikha

Kaya naman kita nagustuhan

Kasi ikaw ay nag-iisa lang sa sandaigdigan

Mag-ku-krus kaya muli ang ating landas

Dalawang taong nag-iisa madalas

O 'di kaya aayon ang tadhana, malas!

Makukulong na lang ba sa ating sariling rehas

ALAALA NG ISANG ULYANIN (2025)

sepulturero ng damdaming naagnas na

nililibing ang mga naglilitawang alaala

hinukay nang hinukay, ibabaon din pala

lalagyan ng bulaklak, papatakan ng luha

sa sementeryo ay palaging dadalawin

aalayan at dadasalan ng panalangin

hanggang sa tuluyang burahin ng hangin

ang ako, sa alalala ng isang ulyanin

at kung mabubura na ang pangalan

sa inukitang lapida ay 'yong tandaan

ang memorya mo ay humina man

muli akong magpapakilala sa'yo sa kalangitan

IKATLONG ARAW (2025)

sabi nila may ikatlong araw

pagkatapos mong pumanaw

may sinag na matatanaw

isang kinabukasang dadalaw

ngunit nasa unang araw pa rin ako

tinatraydor ng damdaming gulo

ang puso ay piniprito’t kumukulo

kaya ako muna ay magtatago

sa ikalawang araw nahihimlay

ang dibdib ay papatay-patay

may oras pang magnilay-nilay

sa buhay kong walang kakulay-kulay

kaya sana sa pagdating ng ikatlo

aking pag-asa ay buong-buo

matapang na babagtasin ang landas

haharapin ko na ang aking bukas

happy easter, sister!

O ANGHEL NG KAMATAYAN(2025)

Ako ang swerte, ako ang malas

Ikaw ang madaya, ikaw ang patas

Ikaw at ako mahina, looba'y parehong 'di malakas

Ngunit ikaw pa rin ang aking simula, gitna, at wakas

O anghel ng kamatayan

Huwag mo na kami lampasan

Ang kwento namin ay iyo nang wakasan

Kahit wala pa man kaming nasisimulan

Ako ang buwan, ikaw ang araw

Ikaw at ako nagtatago, paano matatanaw

Sa'ting puso'y nakatarak, isang matalim na balaraw

Sa'ting pag-ibig, 'di pa buhay, agad nang pumanaw

O anghel ng kamatayan

Huwag mo na akong tanggihan

Para ang kwento namin ay matuldukan

Kahit wala pang kabanatang laman

TAGOS-TAGUSAN (2025)

Ang tingin mo'y nasa malayo

Habang ako ay nandirito

Nakakulong ka pa sa nakaraan

Habang ako ay nasa iyong harapan

Paano na tayo? Uusad pa ba?

O hanggang dito na lang ba talaga?

Tagus-tagusan pa rin ang tingin

Kahit pilitin, 'di magiging akin

Ngunit akin pa ring ipinapanalangin

Na baka pagsamo ko'y dinggin

Na sana ako ay iyong piliin

At ako ay magustuhan mo rin

PAG-AMIN (2025)

 Laman ka ng bawat aking panalangin

Ang hinahanap-hanap kong salarin

Ninakaw mo ang puso ko't damdamin

Kaya lang umuurong ang dila, 'di maamin

Alam mong may pag-asa ka naman sa akin

Isang salita mo lang agad ko 'tong tutuparin

Kaya lang baka may iba kang pinapansin

Andito lang naman ako nagnanakaw-tingin

Maglakakas-loob kaya akong sabihin

Ang sa pusong lihim na pagtingin

Sana pag ito ay akin nang inamin

Suklian mo sana, tanggapin at dinggin

COINCIDENCE: PART 2 (2025)

Was it coincidence?

When I commented my mwa mwa

Then you storied, "can I have a keys (kiss)?"

Was it coincidental

When I unarchived my post

Then, you unarchived yours too?

Was it fate and destiny?

When I didn't look you in the eye

Yet you hugged me as goodbye

Was it plain incident?

When you heart my birthday post

Then you heart my joke and poetry

In the end, I hope it wasn't just coincidence

I hope that you also like me, the way I like you 

And I hope for us to be destined to let the love begin

And I hope our paths will cross again

COINCIDENCE: PART 1

 When two opposing lines coincide

Does it become one on the inside?

When a diagonal and parallel lines intersect

Does it connect like a flower and an insect?

Once is ordinary...

Twice is precautionary...

Thrice is destiny, Thrice is intentional

Or is it merely coincidental?

Fate pushes and pull us

From circumstances disguised as coincidence

Romantic attraction, aching to be asked

Is it really love or is it just limerence?

MARARANASAN KAYA ANG ISANG PAG-IBIG? (2025)

Mararanasan kaya ang isang pag-ibig —

Na hindi kailangang itikom ang bibig

'Yung pwedeng isigaw sa buong daigdig

Pagmamahal na umaapaw, siksik, at liglig

Darating kaya ang taong mamahalin ako

Kahit hindi ako isang perpektong tao

Kung siya ay pupunta? Ako ay nandito

Hindi umaalis sa aking palagiang pwesto

Kung 'di ko mararanasan, kung 'di siya darating

Tatalon na lang ako sa malalim na karagatan

Doon ako ay magpapakain na lang sa pating

Hanggang magkalasug-lasog ang aking katawan

SALING-PUSA (2025)

 Gusto ko munang umidlip

Kahit matagal, kahit saglit

Dahil pagdating ng tanghali

Sa akin ay walang pumipili

Isa akong saling-pusa

Sa mundo ng paglalaro

Lagi na lang ako ang taya

Tinotodo ko, manalo o matalo

Pagod ang katawang lupa

Kahit 'di naman ako kasali

Kailan ba ako magiging bahagi?

At matatapos na sa pagiging saling-pusa

SUNSET (2025)

i will wait for you

like sky waiting for sunset

i will keep you alive

in my memory, in my casket

i will search for love

in every part of your being

i will learn to love

until i found in you its meaning

you opened my heart

like how you inspire me to write poetry

you gave life to my art

i hope that you also like me dreamy

our life once collided

like how the shore meets the sea

just like how the sunset kisses the sky

let's give this love a try

EVEN IF... (2025)

 Am I here fighting a losing battle?

Piercing myself with my own sword

Cause in the end, I don't want to lose you

Even if I don't have you in the first place

I'll just lose me in the process of loving you

If your happiness is my sadness

I'd rather have that than not seeing you

Even if you are not seeing me eye-to-eye

You can have the keys, make your family

Be the happiest that you can ever be

Cause in that way my smile is from you

Even if our story doesn't end with me and you

PS. Nagpost kasi siya sa story ng "susi ka ba? pakeys nga!" Kaya nagselos muna ako. Sino kaya 'yan. Ayoko naman mag-assume na para sa'kin 'yan kasi nagcomment lang ako today ng mwa mwa mwa sa post ng org namin. Pero sabi nga nila never assume unless stated.

KABABALAGHAN (2023)

Dati kinatatakutan ko ang mga hindi nakikita 

Ang mga multo, maligno, at misteryo

Dating panakot sa mga bata

Ang mga kababahalaghang mga kwento

Ngunit nang ako ay nagkaisip na 

Mas nakakatakot pa ang buhay

Kaysa ang mga nakabaon na sa hukay

O kung ano mang likha ng imahinasyong makulay

Ang mga buhay ay kayang-kaya ka saktan

Ang buhay ay kayang makipagpatayan

Kayang pasabugin ang ospital, eskwelahan, at tirahan

Kayang patayin ka kahit ikaw ay isa nang ganap na bangkay

CUBAO (2025)

Nagdaraan, naglalakad, nagmamadali ang mga tao

Dahil ikaw ang gitna, ikaw ang sentro ng mundo

Kahit anong gawing paglibot, pag-ikot-ikot sa Cubao

Sa iyo ay 'di pa rin natututo, palagi pa rin akong naliligaw

Sa kalsada ng Aurora, sa entablado ng Araneta

Sa LRT, MRT, bus, jeep o taxi man ako sumakay o bumaba

Sa pasikot-sikot ng Gateway o kahabaan ng EDSA

Ikaw at ikaw pa rin ang sentro, ikaw ang gitna

Kaya paano kita makakalimutan at maiiwasan

Kung ang lahat ng daanan, ikaw ang patutunguhan

Sa lahat ng mga gilid at sulok, pangalan mong sinisigaw

Sa bawat paglakad at pagtakbo ko sa mga kalye ng Cubao

ABRIL NA NAMAN... (2025)

Abril na naman pwede mo na 'kong lokohin

Pwedeng-pwede lituhin, pwedeng-pwede utuin

Alam mo naman kung paano ako kukunin

Isang ngiti, isang ngisi, pwede mo pang asarin

Hindi mo na ako kailangan pilitin

Hindi mo na rin akong kailangan hilain

Dahil alam mong gustong-gusto na kita

Sana lang ako ay magustuhan mo na rin

Kahit 'di naman Abril, puso ko'y sa'yong sa'yo pa rin

Pwedeng saktan, pwedeng buoin

Pwedeng iwanan, pwedeng mahalin

Basta andito lang ako kahit ikaw ay 'di akin

NANG MAGMAHAL AKO NG KAPITALISTA

NOTE: Parody po ito ng piyesa para sa mga batang ina.

Ang piyesang ito ay para sa mga nagmahal ng kapitalista

Maging gahaman man sila

Magpalamon sa sistema

Sinira ang reporma ni Marx, Gramsci at iba pa

Na sana solusyon sa agwat sa ekonomiya

Na sana sila na ang tulay para guminhawa ang mga buhay

Pero sapat na ba?

Sapat na ba para husgahan sila?

Sisihin sa pagbagsak ng bansa?

Sino ka ba?

Alam mo ba ang buhay at kwento ng ekonomista?

Hindi naman 'di ba?

Kaya wala tayong karapatan para husgahan sila?

Oo, sila ngang nagkamali

Pero ang importante hinarap nila ang responsibilidad at nagtrabaho sa opisina

Para 'di magmukhang walang pera, 'yun ang pinakamalaking pagkasala

Kaya kayong kunwaring mga Marxist

Na walang bahid ng capitalists

Huwag basta-basta manlait

Kasi 'di purket kapitalista

Mga pangarap ng bansa ay 'di na matutupad agad

MUSE OF YOUR MELODY, STAR OF MY POETRY (2025)

I will never be the muse of your melody

But, you'll always be the star of my poetry

How hopeless romantic can I possibly be?

Waiting for the sky meeting the sea

Blindly, following the feeling you gave me

Finding fault, finding love, finding agony

Searching for a sign in this romantic misery

Pleading the heavens for a miracle of mystery

Will I ever be someone's muse?

Of all their reds, oranges, and blues

Someone who'll love me and my poetry

For all my writing is encompassing my humanity

HALAMANG NAMATAY SA LIMOT (2025)

 Punla'y ibinaon sa mabatong lupa

Inihagis na lang basta-basta

Dinilig ang asido sa butong mura

Iniindayog ng pagsigaw at pagsipa

Nang munting dahon ay sumipot

Ito'y nahihiya kaya't namaluktot

Sa sikat ng araw ay natatakot

Sa wisik ng tubig nangingilabot

Kaya't nang sumibol siya ay bansot

Mga talutot ay nangungulubot

Ang mga dahon ay nanunuyot

Kalaunan ang halaman ay namatay sa limot

GUSTO KONG MARAMDAMAN (2025)

"I would rather feel everything than nothing every time."
(Hampstead, Ariana Grande)
(eternal sunshine deluxe: brighter days ahead)

Gusto kong umiyak

Gusto kong humalakhak

Gusto kong magwala

Gusto kong magtiwala

Gusto kong maramdaman

Ang lahat, kahit masasaktan

Sa huli, ako pa ang maghahabol niyan

Simulan mo lang, ako na sa katapusan

Bakit ba gustong malibot?

Ang bawat pasikot-sikot

Sa aking puso, pilit nilimot

Sa hinaharap na maramot

ALAKDAN (2025)

 Tuklawin mo ako

Tapos mabibitin

Lasunin mo ako

Ako pa'y kikiligin

Ikaw ang aking alakdan

Handa akong masaktan

Basta ikaw, walang anuman

Hindi ko na ito mapipigilan

Ang iyong kamandag

'Di ako makakailag

Kahit pa may kalasag

 'Di ako magpapatinag


PS: Pag na-inlove ka nga naman sa scorpio! HAHAHA

SIBUYAS (2025)

Naghihiwa na naman ako ng sibuyas

Pampalubag sa kasalukyang 'di patas

Hayaan mo nang mukha ay kumupas

Habang ang diwa ko'y lumuluwas

Ang kutsilyo sa kamay ay dumudulas

Habang ang puso ko'y balat-sibuyas

Naghahanap ng paunang lunas

Sa mga sugat ko ngayon at bukas

'Di na lang ako maghihiwa ng sibuyas

Pagkat sa damdamin, ako ay umiiwas

Haharapin na ang swerte at malas

Sa ngiti at simangot ng bawat oras

KUNG DUMATING ANG ORAS NA BUMIGAT ANG ARAW (2025)

 Kung dumating ang oras na bumigat ang araw

Huwag mo sanang pasaning mag-isa

Dahil andiyan ako para dumamay at dumalaw

Dahil sa aking kasibulan ay kasama kita

Pag dumilim ang liwanag ng ating buwan

Huwag kang matakot, huwag masaktan

Dahil andito ako, kailanma'y 'di ka iiwan

Ang daigidig man ay tumigil nang tuluyan

At sa pagdating ng pagtatagpo sa duyog

Sana masumpungan mo ang aking puso

Dito ka magpahinga, dito ka matulog

Pagkat ikaw ang aking katahimikan sa mundo

BAYABAS SA PUNO NG MANSANAS (2025)

 Ang hirap maging bunga ng bayabas 

Sa puno na ang bunga ay mansanas

Para kang pinagsakluban ng lahat ng malas

Ang kalangitan ay 'di pa umaaliwalas

Akyatin man ang sangang malalabay

Sungkitin man ang bungang tinataglay

Mananatili ako sa puno, naghihintay

Mabubulok mag-isang mamamatay

Bakit ganito ang pagsibol ng buhay?

Mangangasim ang bunga kaya'y hiniwalay

Kinukwestiyon imbes maging tulay

Kahit parehong prutas ang trato sa'ki'y gulay

KANINO AKO PWEDENG SUMANDAL? (2025)

Pag bumigat ang pinapasan

Kanino ako pwedeng sumandal?

Pag ang puso binubusalan

Kanino ako pwedeng magkwento nang matagal?

Sa pagpapaikot ng aking daigdig

Kailan kaya masusumpungan

Ang para sa aking pag-ibig

'Yung totoo at tapat na sumpaan

Dahil 'di naman na ako bumabata 

Lalo't ang mga magulang ko ay tumatanda na

Maiiwan kaya akong mag-isa sa mundo

Kung ganon, sana ay kunin na lang din ako

GAMOT (2025)

'Di na ko iinom ng gamot

Pag masakit ang ulo

Para ako'y makalimot

Sa mga alaala sa iyo

'Di na ako iinom ng gamot

Pag masakit ang puso

Para ako'y makalimot 

Sa pag-ibig sa'yo

PAANO NA ANG ATING LOVE STORY (2025)

Bakit ba 'di masabi ang mahal kita

Pag ikaw ay nandiyan na

Ako'y natutula 

Nabubulol, nauulol, nauutal pa

Bakit ba ako ganito?

Pag nandiyan ka natotorpe ako

'Di makakatitig nang diretso

Umiiwas, 'di kinikibo

Paano na ang ating love story?

Iiwan na lang sa sorry?

'Di ako mapakali

Sana'y paglaban natin hanggang sa huli

Ang ating love story

Ng isang bibo at torpe

Hanggang sa humantong sa will you marry me

May happy ending din for you and me

BAKIT BA MAHIRAP SABIHIN ANG MAHAL KITA? (2025)

Bakit ba mahirap sabihin ang mahal kita?

Habang nakaharap, nakatingin sa'yong mga mata

Iniibig kang tunay ng puso at ng kaluluwa

Ngunit ang aking bibig ay hindi maibuka

Ibubulong ko na lang ba sa hangin

Isusulat ko na lang siguro sa buhangin

Ang mga hindi ko mabigkas na mga salita

Para sa iyo ang pagmamahal kong sobra-sobra

Bakit ba ang hirap sabihin ng mahal kita?

Wala naman akong pag-aalinlangan o pagtataka

Hiling ko sana makita mo ang iyong kinang at halaga

Kasi sa aking paningin, sa aking damdamin, ito'y kitang-kita

Sana'y masabi ko bago magpantay ang mga paa

Nang pagsisisi ay 'di ko pasanin pa

Pagsamo ko'y maabot ka sana ng aking mga tula

Para malaman mo kung gaano kita kamahal, sinta