KASAL NG DEPRESSION AT INSOMNIA (2025)

Pag kinasal ang depression at insomnia

Uulan, aaraw, at liliwanag ang buwan 

Yagpi-tagping panyo ang traje de boda

At ang handaan sa burol at libingan 

Hahalikan sa pisngi ng mga luha
Huhubarin naman ang magandang alaala
At magniniig ang takot at pangamba
Sa isang gabi ng pamumulot-gata

Magsasama habambuhay ang sumpa
Sa madlang hirap at kaunting ginhawa
Hanggang sa ibuga ang huling hininga
'Di maghihiwalay dito at doon sa kabila

Pag kinasal ang depression at insomnia
Lahat ay imbitado sa burol at libing
Pakabusog kayo sa kape, zesto, at chicha
Hanggang sa muli, ito na ang final viewing

 

BAKIT HINDI NA AKO NANALANGIN? (2025)

Nililibang ang isipang malikot

Para ‘di na maligaw sa pasikot-sikot

Pinipilit na mabura at malimot

Ang tanong na hinubad sa pagkakasuot —

Bakit ako tumigil manalangin?

Pagkat musmos palang tinatakan na

Sa aking murang-mura na isipan

Na sa impiyerno ang aking pupuntahan

Sinubukang magdasal

Sinikap namang maging banal

Ngunit ano ang isinukli?

Mapanghusgang tingin at salita

Hindi naman ako tumigil manalangin

Sadyang pinipili lang nila ang maliligtas

Marahil ‘di ako napili pagkat iba…

Dapat hipokrita rin akong makasalanan

Pinapako niyo lagi sa krus

Kayo ang Hudas kay Hesus

Mga makabagong Pontio Pilato

Humahatol agad sa tao

Kaya ano pang saysay ng buhay

Kung para rin naman akong pinapatay

Sana sa impyerno ay tanggapin

Ang aking mga pagsamo’t dalangin —

Hanggang sa nilagay na ang tungtungan

Itinali nila ang lubid sa kisame

Isinuot na rin ang ulo sa butas

Tinulungan pang tumalon para magbigti

Hindi ako nagpakamatay

Pinatay niyo ako

Ikaw ang may kasalanan

Nasa kamay mo ang dugo

Maghugas ka man ng konsensya

Magkumpisal man sa parokya

Hindi ka mapapatawad

Mabubulok na sa purgatoryo

Hindi naman ako magmumulto

Didiretso na agad sa impyerno

Kaya huwag niyo na akong hanapin

Pagkat ngayon alam niyo bakit ‘di na ako nanalangin

UNDAS (2025)

hinuhukay ang lupa

ang ataul ay ibababa na

huling tingin na sa bangkay

tatabunan na rin pagkatapos

pagkat buhay namamatay

 ang simula natatapos

ngunit ako ay humihinga pa

ngunit nabubulok na

ang kaloob-kalooban

pagkat ang basura

hindi natapon sa basurahan

hindi kasi pwedeng tuluan

ang kabaong ng luha

pagkat mamalasin daw

kaya’t ang bulaklak ay nauhaw

tuwing undas lang dinadalaw

ang mga yumaong namayapa

ngunit aking kaluluwa

nagpantay na ang mga paa

kaya kahit sindihan ang kandila

hihipan din ng hangin

ang aking mga panalangin

pagkat sa buhay ngayon at sa kabila

hindi pa rin naman payapa

 

MEMORIES OF A GOLDFISH (2025)

a prison made of glass

filled with memories of past

it stays in your heart but it doesn't last

or so i think

swimming inside aquarium

filled with tragic hums

echoing the tugged strings of my heart

and so i hurt

until the day comes when

i lose all the oxygen

then i float to the top

filling in the memories of goldfish, the in between and the gap

ISINUKA (2025)

Nabuo sa sinapupunan

Tumagal nang siyam na buwan

Pagdating ng kapanganakan

Hindi isinilang, kundi isinuka

Niluwa sa lipunang mapanghusga

Nilait mula ulo hanggang paa

Katawan pati kaluluwa

Ano bang kasalanan

Para kutyain, para talikuran

Kung iibig lang naman

Kung magpapakatotoo

Mas gusto ba nilang magsinungaling ako?

Gusto akong magbago

Bakit hindi kayo?

TAKOT SA KALULUWA (2025)

Natatakot ka sa kaluluwa

Ngunit, 'di sa nabubuhay

Magkakaroon lang ba ako ng halaga

Pag ako ay namatay

Buti pa ang 'di nakikita ng mata

Binibigyang-pansin ang nararamdaman

Akong nakikita at nakakasama

Higit pa sa lupa kung tapakan

Siguro sa kabilang buhay

Maghihilom ang mga bukas kong sugat

Sa libingan ko ihihimlay

Matutuyo ito at magiging peklat

BIGLA! (2025)

biglang 'di na ako natatakot tumalon sa ikasampung palapag

para magwakas ang 'di matapos-tapos na sumpa ng magdamag

bakit parang 'di maubos-ubos ang problemang dagdag nang dagdag

ang katawang kalunos-lunos matutulad na sa kaluluwa kong basag

ang ang kulang-kulang kong nakaraan

tumatagos sa naghihingalong kasalukuyan

at sa hinaharap kong walang kasiguraduhan

puputol-putulin ang buhay kong walang katapusan

biglang 'di ako nalulula mataas-taas na gusali

biglang 'di nakakalunod ang malalim-lalim na dagat

biglang nakakaenganyo nang si kamatayan ngumiti

biglang naglakad-lakad sa mga bubog na nakakalat

biglang hindi na ako nabigla

na bigla na lang akong bumulagta