FAKE NEWS (2021)

Ang balitang nagkalat

Siguraduhing tunay 

Bago mo ipagkalat

Nang 'di manira'ng buhay

BAYANING NAKATAKIP ANG MUKHA (2021)

May takip man ang mukha

'Di maikakaila

Sila'y bayaning dakila

Ngayong nagkapandemiya

Sinusuong ang laban

Buhay ay iaalay

Nang maligtas ang bayan

Sila’y dakilang tunay

KABATAANG FILIPINO (2021)

Oras na ngang sumulat

Tungkol sa ating bayan

Ng kabataang mulat

Sa isyung panlipunan

Halina at umaksiyon

Lumaban't magdesisyon

Ngayon ang s'yang panahon

Wakasan ang opresyon

Kung 'di kikilos

Pano 'to matatapos?

Kung 'di tayo? Sino na?

Ang lilingap sa bansa?

BAKUNA O KORONA (2021)

Isang taon na korona

Suot-suot ng madla

Bigat ng pagdadala

'Di maipasa-pasa

Bayang nag-aalala

Sagot ba ang bakuna?

Salot ba'y mapupuksa?

O lalong mapalala?

Tanong ng bawat isa

Ano bang mahalaga?

Bakuna o korona?

Korona o bakuna?

KULTULA: KULTURA NG TULA (2021)

Kaputol na ang tula

Ng ating mga dila

Hinulma ang kultura

Ng tugmaang salita

Taglay ng ating nuno

Sangkap sa pagkukwento

Gamit-gamit ang sulo

Sinasalin ang turo

Ang salitang may ritmo

Gamit sa Kristiyanismo

Nang lumaganap ito

Sa ating mga pulo

Ang mga tulang binhi

Hinasik pa ng bayani

Rebolusyon ng lahi

Laban sa manggagapi

At sa kasalukuyan

Sining na panitikan

Ito'y napagyayaman

Ng makata ng bayan

Tuloy na nananalaytay

Tuloy pagsasalaysay

Hanggang sa magtiwasay

Hanggang bukang-liwayway

REGALO (2021)

Ako'y isang regalo 

Na di mo binuksan

Iyong itinago't kinandado

At 'di na nalaman ang laman

Ika'y isang regalo

Na iniingat-ingatan ko

Pero nagkamali ako

Dahil 'di ka pala sa 'kin niregalo