"Sa mga mahahalimuyak at makukulay na bulaklak ng aking kabataang naisatitik para sa alaalang aking sasariwain at babalik-balikan."
Ikaw ang pininta
Ako ang taga-pinta
Ng ating pagsinta
'Sing rikit ng obra maestra
Sa kawalan ng kulay
Ikaw ang bahagharing tulay
Na inspirasyon ang bigay
Obra maestrang alay
Isang obra maestra
Ang masinsinan pagkakalikha
Na pag-ibig ang siyang adhika
'Sing husay ka ni Juan Luna
Bakla! Bakla! Bakla!
Tukso sa batang lumuluha
Na kung kumilos ay parang dalaga
Na nasa katawan ng binata
Bakla! Bakla! Bakla!
Tawag ng lalaking nanuntok kanina
Ang mukha kong masaya
Ngayo'y puno na ng pasa
Bakla! Bakla! Bakla!
Mga salitang 'di ko ikakahiya
Dahil dito'y lumaki akong nakatingala
Kahit na pilit akong payukuin ng iba
Ang pamagat na magkabiyak
Ang salitang bunsod ng pag-ibig
Ang katagang inaasam masambit
Ang isang bagay na hindi ko makakamit
Tayo man ay magmahalan
Tingin nila ay pawang kataksilan
Taong itatakwil ng tahanan
Tila ka isinuka ng sanglibutan
Magkaroon man tayo ng kwento
Maisulat man ang pagmamahalang itinago
Mabilis man dumaan ang panahon
Mananatili tayong walang pamagat
Nang may biglaang kumalabit Si Kamatayan ay lumalapit Ang dibdib sumikdo't namilipit Pwede ba manlimos kahit isang saglit ulit Hinahabol...